ليش أهج تسألني عمي ؟
أرجوك لا تبجي إعله همي
من أسولف , وأفك فمي
بشر أنه ...موش بومه !
راح أهج يمكن لروما

عمي سالفتي بسيطه
بالحلك حطولي ليطه
 هالنشامه اخوان زيطه
 وباكو هدومه !مصلخ
راح أهج يمكن لروما

منهو ذوله ؟ صدك تسأل ؟
وإنت أفهم مني وأعقل !!
أدري تعرف , أدري تندل
تريد كلبي يكت همومه
راح أهج يمكن لروما

خوش راح أرسم الصوره
الدهر ذب عليه جوره
قسمه عميه وعيشه عوره
وليلي طفه كل نجومه !
راح أهج يمكن لروما

أمي جابتني عراقي
وكالت بهالوطن باقي
يمه جذرك جذر راقي
وكاعك الطيبه رحومه
راح أهج يمكن لروما

وأنه أحب أمي هوايه
وصدكت هاي الحجايه
كلت باقي بهالولايه
, حضن أمومه وكاعي مثلج
راح أهج يمكن لروما

قريت بالتاريخ عجبه
عدنه كلكامش وصحبه
والخليل إكتشف ربه
بكاعنه وفاضت علومه
راح أهج يمكن لروما

وعدنه أور وعدنه بابل
وعدنه أشور الآصائل
والجنائن والخمائل
تحجي أثاره ورسومه
راح أهج يمكن لروما

وشفت بالدنيه العجيبه
مرت أقوام غريبه
بهالارض , شربت حليبه
وذابت , وغطت بنومه
راح أهج يمكن لروما

وإجه هارون الرشيدْ
وخضّرت أيامه عيد
وشمخ فوك الدنيه جيد
تبغدد وعاش بنعومه
راح أهج يمكن لروما